ਕੈਨੇਡਾ ਦੀ ਜੌਬ ਮਾਰਕੀਟ ਵਿੱਚ ਮਿਲੇ ਮੰਦੀ ਦੇ ਸੰਕੇਤ

ਕੈਨੇਡਾ ਦੀ ਜੌਬ ਮਾਰਕੀਟ ਵਿੱਚ ਅਗਸਤ ਮਹੀਨੇ ਮੰਦੀ ਦੇ ਸੰਕੇਤ ਮਿਲੇ ਹਨ। ਸਟੈਟਸ ਕੈਨੇਡਾ ਮੁਤਾਬਕ, ਅਗਸਤ ਵਿੱਚ ਦੇਸ਼ ਵਿੱਚ 42 ਹਜ਼ਾਰ ਨੌਕਰੀਆਂ ਘਟੀਆਂ, ਜਦਕਿ ਅਰਥਸ਼ਾਸਤਰੀਆਂ ਨੂੰ 15 ਹਜ਼ਾਰ ਨੌਕਰੀਆਂ ਵਧਣ ਦੀ ਉਮੀਦ ਸੀ।

ਬੇਰੁਜ਼ਗਾਰੀ ਦਰ 6.4 ਫੀਸਦੀ ’ਤੇ ਸਥਿਰ ਰਹੀ। ਇਹ ਅੰਕੜਾ ਅਜਿਹੇ ਸਮੇਂ ਆਇਆ ਹੈ ਜਦੋਂ ਅਪ੍ਰੈਲ ਤੋਂ ਜੁਲਾਈ ਵਿਚਕਾਰ ਕੈਨੇਡਾ ਵਿੱਚ 1 ਲੱਖ 81 ਹਜ਼ਾਰ ਨੌਕਰੀਆਂ ਵਧੀਆਂ ਸਨ।

ਅਗਸਤ ਵਿੱਚ ਪ੍ਰਾਈਵੇਟ ਸੈਕਟਰ ਅਤੇ self-employed ਵਰਕਰਾਂ ਦੀ ਗਿਣਤੀ ਵਿੱਚ ਵੱਡਾ ਬਦਲਾਅ ਨਹੀਂ ਆਇਆ, ਪਰ ਪਬਲਿਕ ਸੈਕਟਰ ਵਿੱਚ 20 ਹਜ਼ਾਰ ਨੌਕਰੀਆਂ ਘਟੀਆਂ। ਇਹ ਲਗਾਤਾਰ ਤੀਜਾ ਮਹੀਨਾ ਹੈ ਜਦੋਂ ਸਰਕਾਰੀ ਖੇਤਰ ਵਿੱਚ ਰੁਜ਼ਗਾਰ ਘਟਿਆ ਹੈ।

ਦੂਜੇ ਪਾਸੇ, ਅਮਰੀਕੀ ਟੈਰਿਫਾਂ ਤੋਂ ਪ੍ਰਭਾਵਿਤ ਮੈਨੂਫੈਕਚਰਿੰਗ ਸੈਕਟਰ ਵਿੱਚ 22 ਹਜ਼ਾਰ ਨੌਕਰੀਆਂ ਵਧੀਆਂ, ਜੋ ਇੱਕ ਹੈਰਾਨੀਜਨਕ ਮਜ਼ਬੂਤੀ ਵਜੋਂ ਸਾਹਮਣੇ ਆਈ ਹੈ।

ਨੌਜਵਾਨਾਂ ਲਈ ਵੀ ਅਗਸਤ ਮੁਸ਼ਕਲ ਰਿਹਾ। 15 ਤੋਂ 24 ਸਾਲ ਦੀ ਉਮਰ ਦੇ ਨੌਜਵਾਨਾਂ ਨੇ 19 ਹਜ਼ਾਰ ਨੌਕਰੀਆਂ ਗੁਆਈਆਂ। ਹਾਲਾਂਕਿ, ਇਸ ਸਾਲ ਗਰਮੀਆਂ ਦੌਰਾਨ ਵਿਦਿਆਰਥੀਆਂ ਦੀ ਬੇਰੁਜ਼ਗਾਰੀ ਦਰ ਪਿਛਲੇ ਸਾਲ ਨਾਲੋਂ ਘੱਟ ਰਹੀ।