ਮੈਪਲ ਰਿਜ ਵਿੱਚ 3 ਸਾਲਾ ਬੱਚੀ ’ਤੇ ਰਿੱਛ ਦਾ ਹਮਲਾ, ਪੁਲਿਸ ਵੱਲੋਂ ਰਿੱਛ ਦੀ ਭਾਲ ਜਾਰੀ

ਮੈਟਰੋ ਵੈਨਕੂਵਰ ਦੇ ਮੈਪਲ ਰਿਜ ਵਿੱਚ ਇੱਕ 3 ਸਾਲਾ ਬੱਚੀ ’ਤੇ ਰਿੱਛ ਨੇ ਹਮਲਾ ਕਰ ਦਿੱਤਾ, ਜਿਸ ਤੋਂ ਬਾਅਦ ਉਸ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਬੱਚੀ ਦੀ ਮਾਂ ਐਂਡਰੀਆ ਲੇਕੀ ਨੇ ਦੱਸਿਆ ਕਿ ਉਹ ਆਪਣੇ ਪਤੀ ਅਤੇ ਬੱਚੀ ਨਾਲ ਘਰ ਦੇ ਪਿਛਲੇ ਵਿਹੜੇ ਵਿੱਚ ਸਨ, ਜਦੋਂ ਅਚਾਨਕ ਬੱਚੀ ਚੀਕਣ ਲੱਗੀ। ਮਾਂ ਮੁਤਾਬਕ ਪਿਤਾ ਨੇ ਰਿੱਛ ਨੂੰ ਬੱਚੀ ਤੋਂ ਦੂਰ ਕਰਨ ਦੀ ਕੋਸ਼ਿਸ਼ ਕੀਤੀ। ਰਿੱਛ ਮੁੜ ਬੱਚੀ ਵੱਲ ਆਉਂਦਾ ਰਿਹਾ, ਜਿਸ ਤੋਂ ਬਾਅਦ ਪਿਤਾ ਨੇ ਆਪਣੀ ਕੰਪਾਊਂਡ ਬੋਅ ਨਾਲ ਰਿੱਛ ਨੂੰ ਗੋਲੀ ਮਾਰੀ। ਰਿੱਛ ਜ਼ਖਮੀ ਹੋ ਕੇ ਜੰਗਲ ਵੱਲ ਭੱਜ ਗਿਆ। ਬੱਚੀ ਨੂੰ ਏਅਰ ਐਂਬੂਲੈਂਸ ਰਾਹੀਂ ਬੀ.ਸੀ. ਚਿਲਡਰਨਜ਼ ਹਸਪਤਾਲ ਲਿਜਾਇਆ ਗਿਆ। ਉਸ ਦੀ ਗਰਦਨ ਅਤੇ ਸਿਰ ਦੇ ਪਿੱਛੇ ਡੂੰਘੇ ਜ਼ਖ਼ਮ ਅਤੇ ਪਿੱਠ ਤੇ ਗਰਦਨ ’ਤੇ ਕੱਟ ਅਤੇ ਪੰਕਚਰ ਜ਼ਖ਼ਮ ਹਨ, ਪਰ ਉਸ ਦੇ ਪੂਰੀ ਤਰ੍ਹਾਂ ਠੀਕ ਹੋਣ ਦੀ ਉਮੀਦ ਹੈ। ਪੁਲਿਸ ਅਤੇ ਬੀ.ਸੀ. ਕੰਜ਼ਰਵੇਸ਼ਨ ਅਫਸਰ ਸਰਵਿਸ ਨੇ ਇਲਾਕੇ ਵਿੱਚ ਰਿੱਛ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਮੁਤਾਬਕ ਰਿੱਛ ਹਮਲੇ ਤੋਂ ਬਾਅਦ ਵੀ ਘਰ ਅਤੇ ਆਲੇ-ਦੁਆਲੇ ਦੇ ਇਲਾਕੇ ਵਿੱਚ ਕਈ ਵਾਰ ਵਾਪਸ ਆਇਆ। ਅਧਿਕਾਰੀਆਂ ਨੇ ਜਨਤਾ ਦੀ ਸੁਰੱਖਿਆ ਲਈ ਰਿੱਛ ’ਤੇ ਗੋਲੀ ਚਲਾਈ, ਪਰ ਉਹ ਜੰਗਲ ਵੱਲ ਭੱਜ ਗਿਆ। ਰਿੱਛ ਅਜੇ ਨਹੀਂ ਮਿਲਿਆ ਅਤੇ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਮਿਲਣ ’ਤੇ ਉਸ ਨੂੰ ਮਾਰ ਦਿੱਤਾ ਜਾਵੇਗਾ। ਲੋਕਾਂ ਨੂੰ ਘਰਾਂ ਅੰਦਰ ਰਹਿਣ ਅਤੇ ਰਿੱਛ ਦਿਖਾਈ ਦੇਣ ’ਤੇ ਉਸ ਦੇ ਨੇੜੇ ਨਾ ਜਾਣ ਦੀ ਅਪੀਲ ਕੀਤੀ ਗਈ ਹੈ।