ਸਰੀ ਸਿਟੀ ਕੌਂਸਲ ਨੇ 6 ਮਿਲੀਅਨ ਤੋਂ ਵੱਧ ਦੇ ਪਬਲਿਕ ਵਰਕਸ ਠੇਕਿਆਂ ਨੂੰ ਦਿੱਤੀ ਮਨਜ਼ੂਰੀ

ਸਰੀ ਸਿਟੀ ਕੌਂਸਲ ਨੇ 13 ਜੁਲਾਈ ਨੂੰ north ਸਰੀ ਵਿੱਚ ਸੜਕਾਂ, ਫੁੱਟਪਾਥਾਂ ਅਤੇ ਸੀਵਰ ਪ੍ਰਣਾਲੀ ਵਿੱਚ ਸੁਧਾਰ ਲਈ 60 ਲੱਖ ਡਾਲਰ ਤੋਂ ਵੱਧ ਦੇ ਪਬਲਿਕ ਵਰਕਸ ਠੇਕੇ ਮਨਜ਼ੂਰ ਕਰ ਦਿੱਤੇ ਹਨ। ਕੌਂਸਲ ਨੇ jack cewe ਕਨਸਟਰਕਸ਼ਨ ਲਿਮਿਟੇਡ ਨੂੰ ਲਗਭਗ 16 ਲੱਖ 89 ਹਜ਼ਾਰ ਡਾਲਰ ਦਾ ਠੇਕਾ ਦਿੱਤਾ ਹੈ। ਇਸ ਤਹਿਤ 96 ਐਵੇਨਿਊ, 130 ਸਟਰੀਟ, 92 ਐਵੇਨਿਊ ਅਤੇ 102 ਐਵੇਨਿਊ ਸਮੇਤ ਪੰਜ ਥਾਵਾਂ 'ਤੇ 1,830 ਮੀਟਰ ਨਵੇਂ ਅਤੇ ਅਪਗ੍ਰੇਡ ਕੀਤੇ ਫੁੱਟਪਾਥ ਅਤੇ ਤਿੰਨ ਨਵੇਂ ਕਰਾਸਵਾਕ ਬਣਾਏ ਜਾਣਗੇ। ਇਸ ਤੋਂ ਇਲਾਵਾ crown ਕਾਂਟ੍ਰੈਕਟਿੰਗ ਲਿਮਿਟੇਡ ਨੂੰ 19 ਲੱਖ 13 ਹਜ਼ਾਰ ਡਾਲਰ ਦਾ ਠੇਕਾ ਦਿੱਤਾ ਗਿਆ ਹੈ। ਇਸ ਪ੍ਰਾਜੈਕਟ ਅਧੀਨ 144 ਸਟਰੀਟ 'ਤੇ 100 ਐਵੇਨਿਊ ਤੋਂ 104 ਐਵੇਨਿਊ ਤੱਕ ਮਲਟੀ-ਯੂਜ਼ ਪਾਥਵੇਅ ਅਤੇ ਨਵੀਂ ਸੜਕ ਲਾਈਟਿੰਗ ਬਣਾਈ ਜਾਵੇਗੀ। ਕੌਂਸਲ ਨੇ ਕੰਪਲੀਟ ਯੂਟਿਲਿਟੀ ਕਾਂਟ੍ਰੈਕਟਰਜ਼ ਲਿਮਿਟੇਡ ਨੂੰ 24 ਲੱਖ 66 ਹਜ਼ਾਰ ਡਾਲਰ ਦਾ ਠੇਕਾ ਵੀ ਦਿੱਤਾ ਹੈ। ਇਸ ਤਹਿਤ ਚਾਰ ਥਾਵਾਂ 'ਤੇ ਪੁਰਾਣੀ ਅਤੇ ਛੋਟੀ ਸਮਰੱਥਾ ਵਾਲੀ ਸੈਨੇਟਰੀ ਸੀਵਰ ਲਾਈਨ ਨੂੰ ਅਪਗ੍ਰੇਡ ਕੀਤਾ ਜਾਵੇਗਾ ਤਾਂ ਜੋ ਵਧਦੀ ਆਬਾਦੀ ਦੀਆਂ ਲੋੜਾਂ ਪੂਰੀਆਂ ਹੋ ਸਕਣ। ਸਾਰੇ ਕੰਮ ਅਗਸਤ ਵਿੱਚ ਸ਼ੁਰੂ ਹੋਣ ਦੀ ਉਮੀਦ ਹੈ ਅਤੇ ਮੌਸਮ ਅਨੁਸਾਰ ਅਕਤੂਬਰ ਜਾਂ ਨਵੰਬਰ ਤੱਕ ਮੁਕੰਮਲ ਕੀਤੇ ਜਾਣਗੇ। ਕੌਂਸਲਰ ਡੱਗ ਐਲਫੋਰਡ ਨੇ ਕਿਹਾ ਕਿ ਭਾਵੇਂ ਇਹ ਪ੍ਰਾਜੈਕਟ ਸੁਰਖੀਆਂ ਨਹੀਂ ਬਣਦੇ, ਪਰ ਸ਼ਹਿਰ ਦੇ ਨਿਵਾਸੀਆਂ ਲਈ ਇਹ ਬਹੁਤ ਜ਼ਰੂਰੀ ਬੁਨਿਆਦੀ ਢਾਂਚੇ ਦੇ ਕੰਮ ਹਨ।